ادعوا للاستاذ محمد جمعة بالشفاء

اخواني واخواتي وقرائي الأعزاء ان شاء الله
وأن تعود له عافيته ويرزقه شفاءا لايغادر سقما  وأن يجعل مرضه في
ميزان حسناته وأن يشفي أمراضنا وجميع أمراض المسلمين
"قولوا آميييييييييييييييييييييييين"

يعلم الله أني  أحبكم في الله حبا جما وأتمني من الله العلي القدير أن يرزقنا جنته

أود من حضراتكم أن تلبو لي طلبا واحدا وهو أن تدعوا للأستاذ محمد جمعة
شقيق أخي بل أستاذي وحبيبي حمدي جمعة بالشفاء العاجل

متقؤليش دي نهاية العالم...!!!!"من تأليفي"

متقؤليش دي نهاية العالم...!!!!

متقؤليش دي نهاية العالم .....متقؤليش
هي الهمة والتربية غيرها مافيش.. ماتقؤليش
لازم نعمل لاجل بلدنا
لاجل سعادة جيل احفادنا
لاجل الأمة اللي احنا عشانها
بنضحي ونستني معادنا
ماتقؤليش دي نهاية العالم ..... ماتقؤليش
هي الهمة والتربية غيرها مافيش.. ماتقؤليش
احنا وجودنا علشان غاية
غاية كبيرة ليها نهايـــــة
هي نهاية بس سعيدة
في الجنة ماتقولش سرايا
ماتقؤليش دي نهاية العالم ..... ماتقؤليش
هي الهمة والتربية غيرها مافيش.. ماتقؤليش
لاجل بنات بيسوء الحال
فجأة تلاقي الدنيا زوال
تتبهدل ويسوء احوالها
وهي أساسا نسج خيال
ماتقؤليش دي نهاية العالم ..... ماتقؤليش
هي الهمة والتربية غيرها مافيش.. ماتقؤليش
بس الطامة لما بتهيل
فجأة تلاقي فتاه وزميل
متأنكجة علي قصر النيل
ضعيف القلب لعابه يسيل
ماتقؤليش دي نهاية العالم ..... ماتقؤليش
هي الهمة والتربية غيرها مافيش.. ماتقؤليش
لأجل المال الدمع يسيل
فجأة تلاقي صراخ وعويل
والضرب شغال في الحارة
والكارثة بقي الاخ عميل
ماتقؤليش دي نهاية العالم ..... ماتقؤليش
هي الهمة والتربية غيرها مافيش.. ماتقؤليش
صاجب صاحبه بس اناني
فجأة يبيع الضني والغالي
يفشي السر يخون العشرة
واخد الصحبة بس تسالي
ماتقؤليش دي نهاية العالم ..... ماتقؤليش
هي الهمة والتربية غيرها مافيش.. ماتقؤليش
علشان واحد قالو فنان
تسريحة تطلع مشية كمان
فجأة تلاقي الشاب اتغير
هوس الموضة دا كله جنان
ماتقؤليش دي نهاية العالم ..... ماتقؤليش
هي الهمة والتربية غيرها مافيش.. ماتقؤليش
عربي وناسي عروبته ازاي
كل كلامه ميرسي وهاي
تيجي تقوله العربي دا لغتك
!!يمشي يسيبك ويقول باي
ماتقؤليش دي نهاية العالم ..... ماتقؤليش
هي الهمة والتربية غيرها مافيش.. ماتقؤليش
واحد تاني عقله مفيش
كل حياته قرش حشيش
تيجي تقوله عيب وحرام
يصرخ فيك نفض عيش
ماتقؤليش دي نهاية العالم ..... ماتقؤليش
هي الهمة والتربية غيرها مافيش.. ماتقؤليش
تشوف الشاب ولا علي البال
عاملي ضفيرة لابس خلخال !!
وكمان سلسلة ومغير جنسه
تنادي ياسوسو تلقاه جمال!!
ماتقؤليش دي نهاية العالم ..... ماتقؤليش

الانسان مدني بطبعه

الانسان مدني بطبعه

الانسان مدني بطبعه،يحب الناس ويهوي مخالطتهم،ويعشق الكلام معهم
في ظل مدنيته قد يكتسب أصدقاء يكونون له نبراسا علي الحق وقد يكتسب آخرين

يكونون له أعوانا علي الباطل
وطالما أن الانسان يخطيء ويصيب ، ويعلو وينخفض ""فكل ابن آدم خطاء وخير

الخطائين التوابون""
فلابد عليه وحتما انه سيختلط بهذا وذاك "أقصد بهذا :الهادي الي طريق الحق

،وبذاك:الصاد عنه" وقد يتأثر باسلوب أيهما
لكن الانسان الفطن الذي استعمل عقلا كرمه الله به ،يري ان الهاديين

الي طريق الحق يجب أن يحتفظ بهم ،والصادين

عن طريق الحق يجب أن ينفض يده منهم، ويطير بعيدا عن عالمهم ،لكن لايأتي

يوم القيامة فيقول".......... رب ارجعون"

،ولكن لا يعض علي يديه ويول "......يا ويلتي ليتني لم أتخذ فلانا خليلا لقد أضلني

عن الذكر بعد اذ جاءني"
ولكن يجب أن يستفيد كثيرا من حياته تلك،ويعلم أن أصدقاء السوء لم يوجدوا في

حياته سدي وبدون هدف أو مغزي ،

وانما وجدوا لكن يعلموا الانسان أن هناك جوانب مشرقة وأخري مظلمة ،فاذا

رأي المظلمة وذاق مرارتها وتعثر

في طرقها،"دفعه ذلك أن يستمسك بالمشرقة منها ويلتمس نورها أيا كانت"
لذلك يجب علي كل منا أن تكون حياته الماضية عبرا وعظات وكذلك تراجم

وسير الاخرين 
بهذا يستطيع أن يتحكم في أشياء كثيرة في حياته مثل:ـ"من يصاحب ؟ ولمن يقرأ؟

ومن يحب؟ ومن يكره؟ ومن يفتح له قلبه؟ ومن ومن ومن .................."
أسأل الله تعالي أن تكون تلك الكلمات موفقة واستفدت منها فقد خرجت من

قلبي فأرجو ان تصل كذلك الي قلبك

راقــــــــــي بأخلاقــــــــــي

راقــــــــــي بأخلاقــــــــــي
شعار رفعه طلاب جامعات مصر ولكم اعجبني هذا الشعار ففيه من الروعة والتأثير مافيه
فهو شعار رفعه رسول الله صلي الله عليه وسلم فقال"انما بعثت لأتمم مكارم الأخلاق"
وأريد ان اقول ان الاخلاق لها في الاسلام منزلة عظمي في دنيانا واخرتنا
فالاخلاق هي الحصاد والهدف والغاية من كل العبادات
*******
فتعالي الي الصلاة
يقول الله تعالي"ان الصلاة تنهي عن الفحشاء والمنكر........."ويقول النبي محمد صلي الله
عليه وسلم"
انما اتقبل الصلاة ممن تواضع بها لعظمتي ولم يستطل بها علي خلقي ولم يبت مصرا علي معصيتي وقطع
النهار في ذكري ورحم الأرملة والمسكين ورحم المصاب وابن السبيل"
فانظر الي الهدف من الصلاة وهو التواضع وعدم الكبر ورحمة الارملة وغيرها وهذا كله صلب الاخلاق
***********
وتعالي الي الزكاة
يقول الله تعالي"خذ من اموالهم صدقة تطهرهم وتزكيهم بها ..........."
يقول العلماء "التزكية هي التدريب العملي علي حسن الخلق"
كيف هذا
يوضحها لنا موقف الامام احمد عندما مر علي خنزير فقال له مر بسلام فقال له رفقائه
تقول للخنزير مر بسلام؟
فقال أردت ان اتعلم عليه الحلم.......فهذا تدريب عملي
وتدريب اخر "عندما شوهد عثمان بن عفان وهو يحمل علي كتفه جوالا من دقيق
فقيل له في ذلك فقال أردت ان
اجرب نفسي هل تأبي التواضع أم لا؟
*********
وتعالي الي الصوم
يقول النبي محمد صلي الله عليه وسلم" فاذا كان يوم صوم احدكم فلا يرفث ولا
يفسق ولا يجهل فان سابه احد او
شاتمه فليقل اني صائم"
فلا تسب احد ولا تشتم اخر وحتي وان تعرضت للسب فلتقل اني صائم
********
وتعالي الي الحج
يقول الله عزو جل"الحج اشهر معلومات فمن فرض فيهن الحج فلا رفث ولا فسوق
ولا جدال في الحج......"
فالحج تدريب قاس علي تعلم الاخلاق
وان اردت ان تتأكد فانظر الي هذا الزحام الشديد الذي لا يطيقه الانسان في مواصلة
تستمر دقائق معدودة فمبالك
بايام في السعي والطواف والوقوف بعرفة وانظر الي ضبط الاخلاق لذلك ليس
بغريب ان يرجع الحاج كيوم ولدته امه
ومن هذا كله نري ان كل العادات هدفها الاسمي ان ترقي بأخلاقك وان تحلي بها
أن لايليق بك بعدذلك ان تكون حسن الاخلاق مع والديك واهلك ومع الناس في الشارع
وفي كل مكان؟؟؟؟؟
هيا بنا نعلو ونسمي ونرقي بأخلاقنا ولو لم يكن الا قول رسول الله"ان اقربكم مني
مجلسا يوم القيامة احاسنكم اخلاقا"
هيا بنا اخوتي ان نرفع شعار "راقــــــــــــــي بأخلاقــــــــــــــي"

20/10 يوم ميلادي

20/10
كان يوم ميلادي

بس بجد حبيت اعمل حاجة مختلفة عن اللي بتعمل الأيام دي يعني
مدعيتش اصحابي وقمت عامل حفلة وهاتك يا غني ولا الحاجات دي
او شئ من هذا القبيل لأنني مقتنعمن داخلي بأنعيد الميلاد بدعة وانه ليس
هناك سوي عيدين في الاسلام
ياتري عملت ايييييييييييييييييييييييييييه؟ 
قلت يوم ميلادي ده لازم يكون بداية لصفحة جديدة في حياتي
لازم يكون بداية لمرحلة جديدة مع الله
لازم يكون يوم بدون معاصي ليكون قائدا لكل الأيام
كان نفسي اقتدي بالرسول واصوم اليوم ده بس بجد فاتتني فان شاء الله اصومه
العام القادم
لأن النبي كان يصوم يوم ميلاده ويقول هذا يوم ولدت فيه
لذلك قلت في هذا اليوم
"ودااااااااااااعا لأشياء كثيرة"
"كلها والحمد لله من اجل الله تعالي
فما كان لله دام واتصل وماكان لغيره انفصل وانقطع"
ففي هذ اليوم قلت لابد ان أرضي الله ربي بكل السبل
"وقلت من ترك شيئا لله أبدله الله خيرا منه"
والحمد لله وفقت في ذلك فأسميته
يوم القرار الجرئ أو قل يوم الميلاد بحق
فاللهم يامقلب القلوب والأبصار ثبت قلبي علي دينك
أسأل الله تعالي أن يكون بالفعل بداية لمرحلة جديدة
وبالله عليكم لاتنسوني من صالح دعائكم
وانتظروني ان شاء الله في مواضيع جديدة هادفة ومتنوعة
دمتم في حفظ الله ورعايته

أفضل وثيقة تأمين على وجه الأرض

أفضل وثيقة تأمين على وجه الأرض

يحرص كثير من الناس على تأمين حياتهم وممتلكاتهم عند شركات التأمين
ضد الحوادث والسرقات وغيرها ويدفعون
مقابل ذلك مبالغ طائلة مكنك أن تؤمن حياتك وكذلك آخرتك ولن يكلفك سوى
بعض كلمات خفيفة علي اللسان عظيمة
في الميزان مؤنسة لجنان لو داومت عليها في يومك وليلتك لكفتك وأمنتك من شرور الدنيا وأشرارها



التأمين علي الدنيا والآخرة (التأمين الثلاثي):

التأمين الأول:

قال رسول الله صلي الله عليه وسلم:
من صلى الصبح فهو في ذمة الله


التأمين الثاني:
قال رسول الله صلي الله عليه وسلم:
من قرأ آية الكرسي دبر كل صلاة مكتوبة لم يمنعه من دخول الجنة إلا أن يموت


التأمين الثالث:
قال رسول الله صلي الله عليه وسلم: أن تقول

اللهم أنت ربي لا اله إلا أنت خلقتني
وأنا عبدك وأنا على عهدك ووعدك ما استطعت
أعوذ بك من شر ما صنعت
أبوء لك بنعمتك علي وأبوء بذنبي
فاغفر لى فإنه لا يغفر الذنوب إلا أنتقال: من قالها من النهار موقنا بها فمات
من يومه قبل أن يمسي فهو من أهل الجنة ومن قالها من الليل وهو موقن بها
قبل أن يصبح فهو من أهل الجنة

التأمين الشامـــــــل:
هذا تأمين شامل ضد مخاطر الحياة وشرورها ومن المصائب الفجائية


قال رسول الله صلي الله عليه وسلم:
من قال حين يمسي
" بسم الله الذيلا يضر مع اسمه شيء في الأرض
ولا في السماء وهو السميع العليم“ ثلاث مرات
لم يصبه فجأة بلاء حتى يصبح ومن قالها حين يصبح ثلاث مرات لم يصبه
فجأة بلاء حتى يمسي



التأمين علي أموالك وممتلكاتك:

احرص علي أداء الزكاة
والصدقات تحفظ أموالك وتنميها
قال رسول الله صلي الله عليه وسلم:

ما من يوم يصبح العباد فيه إلا ملكان ينزلان فيقول احدهما اللهم أعط منفقا خلفا
ويقول الآخر اللهم أعط ممسكا تلفا
ويقول صلي الله عليه وسلم أيضا
ما نقص مال من صدقة

التأمين علي أولادك:

أن تعمل صالحا في حياتك وتتق الله في تصرفاتك

قال الله سبحانه وتعالى في سورة الكهف:
"وأما الجدار فكان لغلامين يتيمين في المدينة وكان تحته كنزلهما وكان أبوهما صالحا"

قال ابن عباس: حفظ الكنز بصلاح أبيهما
وقال ابن المنكدر: إن الله يحفظ بصلاح العبد ولده وولد ولده


التأمين ضد الأعطال العارضة:

قال رسول الله صلي الله عليه وسلم:
إذا مرض العبد أو سافر كتب الله تعالي له من الأجر مثل ما كان يعمل صحيحا مقيما

فإذا حرصت على الطاعات وأعمال الخير وصلة الرحم والنوافل وجعلتها من
برنامجك اليومي فإن الله سيكتبها لك كاملة إذا انقطعت عنها لمرض أو سفر


التأمين علي المكان:

قال رسول الله صلي الله عليه وسلم:
من نزل منزلا ثم قال
”أعوذ بكلمات الله التامات من شر ما خلق“
لم يضره شيء حتى يرتحل من منزله ذلك

التأمين علي الصحة:

هل تعلم أن الضغوط اليومية والهموم تؤثر علي صحة الإنسان وتجعل مقاومته ضعيفة للأمراض
أما إذا كان الإنسان يملك قلبا هادئا مطمئنا اكتسى جسمه بالصحة والعافية

يقول المولى عز وجل " ألا بذكر الله تطمئن القلوب" فأكثر من ذكر الله يطمئن
قلبك ويقوى جسمك وتكمل صحتك

قال رسول الله صلي الله عليه وسلم:
”داووا مرضاكم بالصدقة“
فالصدقة أفضل وسائل الوقاية من الأمراض والعلل

التأمين علي الدعاء:

إذا أحببت أن يستجاب دعاؤك
فأدع لأخيك المسلم بمثل ما تريد
قال رسول الله صلي الله عليه وسلم:
دعوة المرء المسلم لأخيه بظهر الغيب مستجابة عند رأسه ملك موكل كلما
دعا لأخيه بظهر الغيب
قال الملك الموكل به آمين


التأمين علي النوم:

حتى لا تصاب بالقلق والأرق والاحلام المزعجة احرص علي قراءة
أذكار النوم وأهمها قراءة آية الكرسي


قال رسول الله صلي الله عليه وسلم:
إذا آويت إلي فراشك فاقرأ آية الكرسي فإنه لا يزال معك ملك من الله تعالى
حافظ ولا يقربك الشيطان حتى تصبح


التأمين ضد الشيطان:

قال رسول الله صلي الله عليه وسلم:
من قال حين يخرج من بيته
بسم الله توكلت علي الله ولا حول ولا قوة إلا بالله
يقال له هديت وكفيت وعفيت وتنحى عنه الشيطان

بالله عليك :لاتنسي ان تترك رأيك وتعليقك علي هذا الموضوع فرأيك يهمني

رمضان فرصة للتغيير

۩۩رمضان فرصة للتغيير

بادي ذي بدء وكماهو من الواضح والمعروف أن سلسلستنا"وحضرتك حي ولا عايش" هدفها الأسمي هو التغيير
ولأننا ننتظر قدوم شهر رمضان وهو بلا منازع يعتبر بوابة التغيير
0لذلك عاوز أسألك سؤال:رمضان القادم ان شاء الله ليه ترتيب خاص في دماغك
ولا ايه؟ولا زي كل رمضان؟ولا انت سايبها وظرفها؟
هترد وتقول لأ"دا أنا عامل ميزانية خاصة للشهر ده بالذات"
أقولك مش ده اللي أنا أقصده!!!!

؛أنا أقصد :انك فعلا ناوي تتغير في رمضان الجاي ولا لأ؟؟
ليه أنا بسألك ناوي تتغير ولا لأ؟
علشان حاجة مهمة جدا والتي يوضحها الرسول صلي الله عليه وسلم فيقول "نية المرء خير من عمله"
ويقول في حديث اخر "من هم بحسنة فلم يعملها كتبت له حسنة............"؛ وهي أننا قد توافينا المنية قبل
حلول رمضان كما هو حال الدنيا فيموت الشاب قبل الكبير ولأن الموت ليس له علامات أومقاييس
ازاي نخلي رمضان بوابة للتغيير؟
1-أول شيء ممكن نقوله :انك في الشهر ده بتمنع نفسك عن الحلال كـ"الأكل والشرب والمعاشرة الزوجية"!!!
فأحر بك أن تمنع نفسك عن الحرام والشهوات !!!
* فيللي بتاكل حرام مش قادر تبطله وانت ذات نفسك بتمتنع عن الحلال"يعني معني كده ان المبدأ عندك بس محتاج عزيمة –محتاج ارادة"
* وانت يللي بتشرب الحرام سواء كانت "سجاير أو شيشة أ وخمرا"مش قادر تبطلها برضه وانت بذات نفسك
بتمتنع عن الحلال وهو المياه
* وانت يللي حياتك كلها البنات والمعاكسات والمغازلات والعلاقات المحرمة ؛مش قادر تبطل معاكساتك دي
وانت بنفسك امتنعت عن زوجتك التي هي حلالك!!

۩ انت عارف معني انك تعمل كده ايييييييييييييه؟؟؟
1-أول معني معني انك لا تستعمل عقلك الذي كرمك كرمك الله به؛وانت عارف لما متستعملوش معناها ايه؟؟
"معناها انك تنازلت عن آدميتك وانتقلت الي مرحلة اخري وهي"...........!!!"؛وربنا هو اللي بيقول كده"
قال تعالي"ولقد كرمنا بني آدم........".
2-المعني التاني انك تضع نفسك في دائرة الخزي والتردي في العذاب في الآخرة ؛ومش انا اللي بقول برضه
دا ربنا اللي بيقول في كتابه"......أفتؤمنون ببعض الكتاب وتكفرون ببعض فماجزاء من يفعل ذلك الا خزي في الحياة الدنيا ويوم القيامة يردون الي اشد العذاب..........".

2-تاني شيء ممكن نقوله في الشهر ده
* انك ممكن تخلي رمضان فرصة لترويض نفسك علي القيام والتعبد والتقرب الي الله عزوجل ؛فمينفعش تبقي داخل الشهر بحماس وهمة وبعد كده تفتر الهمة ؛فيكون قيامك وتهجدك أول الشهر وتترك باقي آيامه
لو فعلا حصل معاك كده وسيبت القيام في باقي ايام الشهر يبقي قيامك في أوائل الشهر كان تحصيل حاصل "يعني شفت الناس بتصلي قيام فتكسفت تروح وقعدت تصلي معاهم وهكذا؛فان كان الأمر كذلك فتلك مصيبة وان كان غير ذلك فالمصيبة أعظم.

3-تالت حاجة ممكن نقولها ان الشهر ده فرصة كبيييييييييييييرة لترويض النفس علي الخلاق الحسنة الكريمة لأنك في شهر رمضان تتمتع برحابة الصدر وسعة القلب واستمع الي حديث النبي صلي الله عليه وسلم"....فاذا كان يوم صوم أحدكم فلا يرفث ولا يفسق ولا يجهل فان سابه احد أو شاتمه فليق اني صائم........."

4-رمضان فرصة للتدريب علي قراءة كتاب الله عزوجل "فأقل واحد المفترض انه بيختم القرآن علي الأقل مرة في رمضان "يعني كل يوم جزء فاستغل الفرصة وهيء نفسك واستعد ان تختمه ولو مرة في الشهر ده وبعد كده متسيبوش لكي لا ندخل في دائرة "وقال الرسول يارب ان قومي اتخذوا هذا القرآن مهجورا"
ودرب نفسك علي صلة الرحم وعلي العطف علي الفقراء والمساكين وكل الاعمال الصالحة التي تجعلك قريبا من الله
۩۩آآآآخر حاجة "رمضان بكل المقاييس فرصة للتغيير فمتخليهوش يضيع منك فتدخل
في دائرة خاب وخسر والتي وردت في الحوار الذي دار بين الرسول وجبريل فيقول جبريل :خاب وخسر من أدرك رمضان ولم يغفر له قل آمين فقلت آآمين

اخيرا وليس بآخر نسأل الله أن يبلغنا رمضان وأن يجعله شهرا برا ورحمة ورقي وسمو وعلو

"اللهم آآآآآآميييييييييييين""

التغيير يبدأ من البيت

التغيير يبدأ من البيت

البيت هو المدرسة التي يتعلم فيها الانسان القيم والاخلاق
البيت هو الزهرة التي يمتص الطفل رحيقها ويطير الي حيز الوجود حوله
البيت هو النواة التي تخرج لنا الخلية الانسانية
البيت هو الاساس وهو صلب المجتمع الكبير
البيت هو البيئة الأولي التي يتأثر بها الطفل

من هذا كله يتبين لنا ان البيت هو كل شيء في الحياة
لذا كان لزاما علي الآباء والأمهات أن يعتنوا بأبنائهم ويحافظوا عليهم من كل سوء ويرشدوهم الي كل
طريق سوي ومستقيم
وانطلاقا من قول رسول الله صلي الله عليه وسلم"كلكم راع وكلكم مسئول عن رعيته........." يتحتم علي
الوالدين مسئولية كبيرة تجاه أبنائهم
فليس مطلوب من الوالدين أن يوفرا لأبنائهم الطعام والشراب والكساء و.........وفقط!!!!!!!
لكن هناك مهام أكبر وغايات أعلي ؛فالأكل والشرب والكساء مطلوب ولكنها

وسائل لغايات أكبر وهي أن
نربي أبنائنا علي أسس اسلامية صحيحة
ولكن لكي يتغير ابنك ويتحول الي الأفضل لابد ان تكون له أنت قدوة""بمعني

أنك لا تأمره بالصلاة مثلا وأنت
مفرط فيها‘وأن تأمره بصلة الرحم وأنت قاطع لها""
حتي وان استمع الي كلامك ونفذ أوامرك فلأنه مازال طفلا يخافك ويهاب

بطشك؛لكنه اذا ماكبر واشتد عوده سيرد عليك اذا أمرته بالصلاة وأنت لا تصلي بقوله""طب صلي انت الأول.........الس آخر هذه الكلمات الواقعية"
وانطلاقا من المقولة التي تقول " اصلح نفسك وادع غيرك"كان ابد عليك أن تغير

نفسك أولا ثم بعد ذلك تنطلق لتغيير من حولك حتي ولو أهل بيتك لأن فاقد الشيء

لا يعطيه
وانظر وتأمل وتدبر تلك الآيات لكي تعلم أن التغيير يبدأ من البيت قول سيدنا

زكريا للسيدة مريم ""........كلما دخل عليها زكريا المحراب وجد عندها

رزقا قال يا مريم أني لك هذا قالت هو من عند الله"؛وهذه قاعدة
أساسية
في تربية ابنك بأن تساله عن كل شيء جديد معه "من اين لك هذا""او "جبته

منين"وهكذا

كذلك لابد عليك أن تختار لابنك أصدقائه ؛لكن بدون تعسف ؛يعني متقولوش "

صاحب فلان ومتصاحبش فلان"ولكن بين له ميزات فلان وعيوب فلان واقعد

اتناقش معاه وسيبه هو يحكم في الآخر"يعني قوله
مثلا ينفع يا معاذ انك تمشي مع فلان ده اللي مبيصليش "فهيقولك لأ طبعا

يابابا "فهتقوله طب
هتعمل ايه"هيقولك ممشييش معاه تاني يا بابا"""انت دلوقتي فرضت عليه

رأي؟؟!!"بالطبع لأ هو
اللي اختار بس اختار الصح"انت عارف ليه علشان انك قدرتوا وعرفتو قيمتوا"

وهكذا

وعلي فكرة الطفل أول ميتولد هيتأثر بالبيئة اللي حواليه اللي هي البيت فانت

لازم تهيأ له الجو قبل ميتولد
يعني من امتي يعني؟؟من الشهر السابع مثلا؟أقولك لأ طبعا؛هتقول من الشهر

الأول ولا ايه؟ أقولك
لأ برضه
"تهيئة الجو " تبقي من ساعة اختيار أمه"ياااااااااااااااه يعني من ساعة الخطبة"

اه شفت بقي

أخيرا وليس بآخر ربي أبنائك تربية اسلامية صحيحة لكي لا يأتو يوم القيامة

ويتعلقو برقبتك ويقولون

يارب رآنا علي المعصية ولم ينهانا
وفوق كل هذا أما تريد أن يكون لك بعد مماتك ولد صالح يدعو لك؟؟؟!!!!!!!!!!!

طبتم وطاب كلامي معكم وعسي أن يكون كلامي طاب لكم وبالله عليكم

لاتنسوني وأمي من الدعاء
وجزاكم الله خيرا

ادعوا لوالدتي بالشفاء العاجل

أخواني وأخواتي قراء المدونة وزائريها
أستلحفكم بالله أن لا تنسوا "أمــــــي" من الدعاء بالشفاء العاجل والمعافاة
لأنها تمر بمنعطف خطير من المرض
نسأل الله تعالي أن يكشف عنها الضر فهو أرحم الراحمين
ومرة أخري
لا تنسوها من صالح دعائكم بالشفاء العاجل
ولكم جزيل الشكر والتقدير

العاطفة منبع الحنان أصل التغيير

العاطفة منبع الحنان أصل التغيير

هو فعلا العاطفة منبع الحنان؟
طب ولو كده هل الحنان أصل التغيير؟

طب تعالوا نعرف يعني ايه العاطفة؟
العاطفة معناها الشامل "هي تلك المشاعر المتدفقة السيالة التي
تدفع الانسان لقبول أمر ما أو رفضه،والتي تدفعه لحب شئ أو كرهه، والتي
تدفعه للحماسه لقبول عمل ما أو رفضه"

العاطفة يندرج تحتها أطروحات كثيرة أهمها الحنان
الحنان يعني العطف ،يعني الرحمة ،يعني الاحتواء،تعني
الاحساس بالجمال ،وعدم ابخاس الناس حقوقه
ومن لايفعل ذلك فأقل ما أصفه به بأنه مشاعره جامدة ينافي الفطرة السليمة
التي فطرنا الله عليها.


علي فكــــــــــــــــرة
في رجال أول ميشوف كلمة "حنان"دي يسيب الموضوع ومش بعيد يسيب
المدونة ويقول "ياعم الموضوع ده للنساء"مش لينا
احنا الرجالة، ويقولك اي"أنا راجل :يعني لازم أكون حمش،
لازم أكون تقيل،لازم أكون شديد ،لازم أكون قوي"


أرد علي هذا الرجل الحمش وأقوله:

الرسول صلي الله عليه وسلم كان مثال للرحمة والرقة والحنان ؛وطبعا
الرسول صلي الله عليه وسلم هو المثل وهو القدوة
"ولازم نعمل زي ما كان بيعمل"

الرجل الحمش بيسأل بتعجب
"انت عاوز تقولي ان النبي نفسه كان حنين ؟!!"

انت تاني؟؟؟!!
"ايوه طبعا كان النبي صلي الله عليه وسلم مثال للرقة والرحمة والحنان"
وتعالي نشوف بعض المواقف اللي بتقولينا " يجب علينا ان
تفيض قلوبنا رقة وحنانا علي كل من حولنا ؛علي والدينا ،علي أولادنا،علي
أزواجنا ،علي كل الأطفال، علي الحيوان

*الحنان مع الوالدين

انظر الي ذلك الرجل الذي جاء الي النبي صلي الله عليه وسلم وطلب منه
أن ياذن له في الجهاد فقال له النبي ألك والدين ؟فقال له نعم؛فقال له النبي :ففيهما فجاهد
"فالحنان بهما برا بهما ورحمة.

*الحنان مع الأبناء

أريد ان انوه الي نقطة هامة وهو أن الحنان الأبوي ؛ليس هو
الحنان المادي ولكنه الحنان المعنوي الذي يشمل الاثنين معا
لأنه بجد الحنان المعنوي اعم وأشمل حتي ولو مع قلة ذات اليد
؛أما الأب الذي تربطه بأبنائه علاقة هات وخد فدي "تأدية
واجب وبس"


احكيلكم حاجة "آخر مرة سافرت فيها البلد سلمت علي أبي
وبوست علي ايده وهو قاعد ؛فقالي استني وقام واقف وخدني بالحضن ؛
والله متتخيلوش قمة السعادة اللي كنت فيها
متسويهاش كنوز الدنيا"
وانظر الي النبي يموت ولده إبراهيم ويبكي صلى الله عليه
وسلم ويقول: ( إن العين لتدمع وإن القلب ليحزن ولا نقول
إلا ما يُرضي ربنا وإنا لفراقك يا إبراهيم لمحزونون )
وذلك الرجل الذي يري النبي يقبل الاولاد فيتعجب ويقول ان لي عشر من الولد
ماقبلت واحد فيهم قط"فقال له النبي "وما أصنع لك وقد نزعت الرحمة من قلبك"


*الحنان مع الأطفال

1-كان النبي صلي الله عليه وسلم يلقي السلام علي الاطفال؛مش دلوقتي لو
طفل قاله السلام عليكم:يقوله يلا يله اجري العب بعيد

2-ويُؤتى بالنبي صلى الله عليه وسلم وصبيٌّ يحتضر وروحه
تقعقع فيحمله صلى الله عليه وسلم ثم تنزل قطرات من الدمع من عينيه صلى الله
عليه وسلم ويتساءل أصحاب النبي صلى الله
عليه وسلم : يتساءلون كيف لهذا القلب الكبير أن يرق ؟ كيف لهذا القلب الكبير
أن يحمل هذه العاطفة لمثل هذا الصبي فيُقال
ما هذا ؟! فيقول: ( هذه رحمة يجعلها الله في قلوب من
يشاء من عباده ) .
3-وذلك الطفل الذي كان يداعبه النبي ويسري عنه وقد مات عصفوره ويقول له
"ياأبا عمير مافعل النغير"

*الحنان مع الزوجة

1-كان الرسول صلي الله عليه وسلم بيدلع السيدة عائشة ويقول لها "يا عائش ويا عويش"،وكان بيدلع السيدة زينب ويقوليها "يا زناب ويا زوينب"؛مش بيقوليها
"يا ولية ،ولا ياستي انتي ،ولا ................." "رقة وحنان ده من النبي ولا لأ؟!

2-ولك ان تتذكر عندما تزوج النبي السيدة عائشة أقام بينه وبينها سباقا فسبقته السيدة عائشة ؛لأنها كانت مازالت خفيفة قليلة الجسم؛فسابقها النبي مرة أخري لما
ملئ جسمها ؛فسبقها النبي وقال لها "هذه بتلك"يعني واحدة بوحدة "مش مثلا بتقوله تعالي
نخرج نتفسح شوية ولا نطلع في مكان فيه خضرة
؛فيقوليها "انتي فاضية؟انتي لسه عيلة صغيرة،
وكمان تلاقى أزواج ماشين
طول النهار يقرفوا في بعض بس ومتخيلين إن خلاص هما اتجوزوا فخلاص يبقى
يكشروا بقى يشيلوا الدنيا على دمغهم ويقرفوا في بعض كان الجواز ده خناقه أو حرب مثلا لازم
يكون فيها غالب ومغلوب

3-وكان الرسول عليه الصلاة والسلام يلاعب فهي بتحكى إنها
أول ما اتجوزت كانت صغيره فكان الرسول بيشيلها على كتافه عشان يفرجها
على مظاهر العيد من الشباك


4- موقف ظريف حصل بين سودة بنت زمعة وبين عائشة
بتقول إيه بقى كانت سوده عامله كعكه للرسول عليه الصلاة
والسلام وعائشة كان مش بتحبها ففضلت سوده تقولها
لازم تأكلي منها وبعدين قامت سوده واخدت حته وعملتها
في وشها بالعافية عشان تآكل فالرسول فضل يضحك
عليهم وقال لعائشة اعملي فيها زي ما عملت فيك
وعملت فعلا كده هزار تقيل شويه بس اقرار من الرسول بالمناغشة والنكش زي مبيقولو ""وطبعا أنا عن نفسي
اللي بحبه قوي بحب انكشه واحب اقعد أناغش فيه "
طب ده لو حصل دلوقتي كان الرجل قام وقعد يضرب
في الاتنين لحد ميبان ليهم صاحب بس الرسول غير
كده كان حنانا فياضا ولطافة دائما.

5-كان الرسول في احد الغزاة ففقدت السيدة عائشة عقدا
لها فحبس الجيش كله أي منعه من الرحيل حتي يبحثوا عن العقد وكانو يحتاجون
الي الماء وليس في هذا المكان ماء؛ولما
لم يجدوه همو بالرحيل فوجدوه تحت البعير""
انظر الي النبي صلى الله عليه وسلم يحبس الجيش كله، ويبقيه يبحث عن هذا العقد،
والقضية ليست قضية رجل يتعلق بالدنيا حاش وكلا، هذا ان دل فانما يدل علي
قلب يفيض رقة وحنانا

بس في نقطة مهمة عاوز أنوه عليها وهي" أن الحنان ليس بمقصور علي الرجال
وفقط ولكن المرأة شريك أساسي فيه"
فالحنان بينهما يتناسب تناسب طردي



*الحنان مع الحيوان

لم تقتصر رقة الرسول وحنانه علي عنصر الانسان ولكنه
امتد الي الحيوان فعن عبد الله بن مسعود رضي الله عنهما
عن أبيه قال : " كنا مع النبي صلى الله عليه وسلم في سفر
فانطلق لحاجته فرأينا حُمَّرة معها فرخان فأخذنا فرخيها فجاءت الحُمَّرةُفجعلت
تفرش فلما جاء رسول الله صلى الله عليه
وسلم قال :"من فجع هذه بولدها ؟! ردوا ولدها إليها"
وقوله في"امرأه دخلت النار في هرة لاهي أطعمتها ولا
هي تركتها تأكل من خشاش الأرض"



**ولكني لو استطردت في مواقف الرسول وحنانه
ورقته لما انتهيت ولكني أكتفي بذلك فخير الكلام ماقل ودل


بس في حاجة أخيرة ممكن أسمع حد بيسألني ويقولي:بس
أنا طبعت أن انا قلبي جامد ولا أرق لأي حدث من أي نوع ؛أعمل ايه؟
أقولك مفيش حاجة اسمها أنا كده ولا انا اطبعت علي كده
؛وده مش كلامي دا كلام النبي حيث يقول "انما العلم بالتعلم وانما الحلم بالتحلم
وانما الصبر بالتصبر" ؛فروض نفسك علي
الحنان وصدقني هتلاقي نتيجة رائعة هتلاقي كلو بيحبك
مصداقا لقول الرسول صلي الله عليه وسلم "انكم لن تسعو
الناس بأموالكم فسعوهم ببسط الوجه وحسن الخلق"

معذرة ان كنت أطلت عليكم بس مقدرتش أختصره
أقل من كده

أخيرا ياريت متنساش تسيب رأيك في سجل الزوار لأنو بجد رأيكم يهمني جداااااااااااااااا

وبعوده وعدنا لكم تاني

وبعوده وعدنا لكم تاني

وبعوده وعدنا لكم تاني
والله وحشتوني يا أحباب
هنوريكم احلي تدوين
يارب ينول الاعجاب


حبايب وكيف ننساكم
وعشنا التدوين وياكم
يمين الله وحشتونا
أمانه ما وحشناكم؟؟!!

يااااااااااااااااااااه  أخيرا خلصت الامتحانات انهارده
وعقبال النتيجة ان شاء الله
(واكيد ليكم الحلاوة)

ريت متنسونيش من دعائكم بالتوفيق وبالتقدير
 (علي فكرة اللي مش هيدعي مش هياخد حلاوة ولو خد حلاوة هتبوظ أسنانه"ههههههههههههههههههههه")



بجد بجد وحشتوني  وحشني الكلام معاكم وحشتنتي تعليقاتكم

ان شاء الله بعود ليكم بمواضيع جديدة يارب تنول اعجابكم

وكمان المدونة بقي فيها "mp4"يحوي فعلا دررا من الأغاني الجميلة المعبرة اللي برضه بتمني ان هي تنال رضائكم

علشان كده عاوزكم تشاركوني في اختيار المواضيع والاغاني والصور وكل مافي المدونة" من عنده رأي او نقد بناء
"فليدلني عليه وبجد هكون شاكر ليه"
"رحم الله امرأ أهدي الي عيوبي""


هستني مشاركتكم في سجل الزوار أو في صندوق الدردشة او بالمراسلة علي بريدي الالكتروني
senior_badr@yahoo.com
senior_badr@hotmail.com

طب ليه مفروض نتغير؟؟!!!

في مدونتنا بنقؤل لازم الانسان يبقي حي ولازم نتغير ولازم يكون لينا هدف نعمل من اجله .
عايش حياتك كلها وهدفك قدامك ،بتنام وانت بتفكر فيه ،بتاكل ،بتشرب ، في كل وقت بتفكر في هدفك وازاي هتوصله ،بتشوف اهتماماتك ،وبتنتقي اصحابك ،من الآخر كده انت عاوز توصل.
هتقؤلي ايه التعقيد ده؟؟؟!!
وانا باكل وبشرب ونايم بفكر في هدفي (آه)،وكمان هتقؤلي آه ؟؟!! هرد عليك واقولك(آه علي آه علي آه علي آه) ،بتضحك شايفك ،بس بجد هي دي فعلا الحقيقة ،انت عارف ليه ؟؟علشان انت عايش حياتك علشان الهدف ده وبتعمل علشانه وعايش جواك ،انت اللي اخترته محدش غصبك عليه،وعارف ليه كمان؟؟ علشان ده اختيارك ،وطبعا مفيش حاجة أحب للواحد من اختياره.
يعني ايه ياسيدي؟؟انت عاوز ايه بالظبط كده ؟؟من اول المدونة وانت شاغل دماغنا بالتغيير وتقؤلينا انتوا عايشين ولا أحياء ،ومواضيع كتيرة خالص .
والله مش عاوز اكتر من ان احنا نتغير ونبقي لينا هدف وطموح وننهض الي العالمية ونرجع اسلامنا لسالف عهده وننشر نوره علي ربوع العالم من جديد.
وده مش هيكون بالركون الي الملذات والشهوات ،سامعك بتقؤول انا مش كده ،هقؤلك طب انت ازاي يعني؟؟؟
هتقؤلي والله بصلي وكده ومبعصيش ربنا علي قد ما اقدر ،هقؤلك جميل ،بس هل هو ده كل حاجة ؟؟؟ هتقول امال ايه يعني؟؟؟
طب ازاي نقول للعالم احنا المسلمين اهوه،وازاي نرفع راية الاسلام من جديد،وازاي نمحي الاسم العالق بوطنا(دول العالم الثالث)،وازاي نخلي لجامعاتنا ترتيب بين الجامعات العالمية.
ده كله مش هيكون بصلاتنا وبس ولا بأعمالنا الصالحة وبس ،مش تحقير لفضل الصلوات والأعمال الصالحة ،داهي الشحنة الروحية اللي بنطلق منها لتنفيذ كل حاجة
بس التغيير ده مش هيكون الا بالخوض في مجالاتهم التي يهتمون بها،زي الطب والصيدلة والهندسة والعلوم والتكنولوجيا،ومش انك بس تنتمي للمجال!!
لأ :لازم تبدع فيه وتضيف اليه اللي هما موصلوش ليه لسه، وفعلا يشوفوك فعلا عامل حاجة جديدة ،وساعتها بقي تلاقيهم بيدوروا عليك وبقولولك ممكن تعلمنا ،ممكن تفيدنا،متتعجبش ،اه هيقولولك كده ،لانهم بيحبوا العلم وبيحبوا يعرفو كل جديد فيه حتي ولو من اعدائهم!،شفت بقي !!!"علشان كده هم متقدمين عننا بكتيييييييييييييييير" .
هتقولي ايه الفايدة بقي لما اضيف حاجة وهم يتعلموها،انا كده عملت ايه،"يااااااااااااااااااااااااااه"دا انت عملت كتير خالص ،بس بشرط واحد انك هم بجد يلمسوا منك تعاليم الاسلام ويحسوا فعلا بمعاملة المسلمين اللي هيا أساسا طراز خاص من المعاملات ،اللي بيستعملها بيوصل لكل القلوب وما دول اوروبا عنا ببعيد وقت ان دخلوا في الاسلام بصدق التجار المسلمين!!.
شفت بقي ايه فايدة ان أنا أتغير وأكون انسان صاحب أهداف وطموحات.
يارب تكون الفكرة فعلا وصلت ليكم ونبدأ فعلا اللي معندوش هدف يحطله هدف واللي عنده ينتقي الوسائل ويعمل علي تجديدها والاضافة اليها.
أخيرا وليس بآخر ،بقوليكم والله اني احبكم في الله وياريت بالله عليكم متنسونيش من صالح دعائكم
والي اللقاء مع موضوع جديد ان شاء الله

معرفش انت ليه مصمم تطلع من غير متسيب لك كلمه في سجل الزوار
ادخل يلا وسيبلك رأي  في سجل الزوار

ويبقي الأمل...

                                                                     

يمكن من اهم حاجة  عملت المدونة دي لأجلها ان انا مقتنع ان الانسان لازم يكون
عنده أمل

 ولازم يقتنع بالتغيير وان مفيش حاجة صعبة في الحياة وكمان برضه مفيش حاجة
سهلة  في الحياة كل حاجة بالممارسة زي
مبيقولوا وهي فعلا .
 وكمان انو مفيش حلوي بدون نار  ويمكن الانسان ساعات بيصل لدرجات  كبيرة من اليأس  والملل في حياته نتيجة  
لما يراه من أشياء تحيط به من أسباب خلوع القلب  وانصرافه عن لذات الحياة وسرورها ولطافتها وسعادتها  مثل ان ينخدع من صديق له أو من سين من الناس فييأس ويمل فأقول له لا تيأس ولا تمل 
فاليأس والملل ليس من صفاتنا 
نحن المسلمين  فيقول الله عزوجل في كتابه العزيز " انه لا ييأس من روح الله
الا القوم الكافرون "
فلذلك يجب ان يكون هناك الامل والتفاؤل لأنه كما يقال " تفائلوا بالخير تجدوه" 
تقول لي في ظل هذه الأحداث المتناثرة
 المتكاثرة المحيطة بنا !!
 أقول لك بلي فأنت بذلك تكون متميزا وما أحسنها من صفة وهي التميز  ولاتنسي قول الرسول صلي  الله عليه وسلم
"يأتي علي الناس زمان القابض في علي دينه كالقابض علي جمرة"  
 هذا ان  دل فانما يدل علي ان الانسان الذي يعلو بنفسه عن السلبيات التي تحيط به ويعلو ويرتقي  فهذا بلاشك
انسان متميز حتي ولو سار ببطء فأظنه ولا محاله سيصل الي مايريد ان شاء الله وسيحقق ما يبتغيه لأنه كما يقال
" من سار علي الدرب كاد أن يصل"  
فهيا الي التغيير
واجعل شعارك  الأمل
واجعل لك  أهداف وطموحات واعمل لها لتصل اليها
 وعندما  يكون الامل سجية  فينا عندها  فقط يمكن القول بأننا سنتغير  ان  شاء الله

ايه مش هتسيبلك تعليق في سجل الزوار
يلا شاركني بفكرك في سجل الزوار

ممكن فعلا أغير حياتي بسرعة؟؟؟؟

هل فعلا أقدر اغير حياتي ببساطة و بسرعة؟


كيف يعني أن  الحياة جميلة ولا تحوي  مشاكل أبداً
و التغيير ممكن و كل شئ بسيط!!!

هناك أناس كثيرون يتعجبون.. يكتشفون ان فيه لحظات مرت عليهم في حياتهم
يسمونها "نقطة تحول"
تغيرت فيها حياتهم في لحظة..
يمكن بسبب معلومة جديدة تعلموها..
ممكن بسبب شخص قابلوه و أثر فيهم جدا...
ممكن  بسبب قرائتهم لكتاب معين ...
ممكن بسبب منظر  شافوه وعاشوه....
ممكن  بسبب  حاجة  اتخدعوا فيها مثلا...
يعني زي مبيقولو ا في المثال "مفيش  حد بيتعلم ببلاش!!"

يمكن حاجات كثيرة .. لكن بعد ذلك  ..كيف يحدث ذلك التغيير السريع؟؟؟..

يقول الله عز و جل
" ذَلِكَ بِأَنَّ اللَّهَ لَمْ يَكُ مُغَيِّرًا نِعْمَةً أَنْعَمَهَا عَلَى قَوْمٍ حَتَّى يُغَيِّرُوا مَا بِأَنْفُسِهِمْ
وَأَنَّ اللَّهَ سَمِيعٌ عَلِيمٌ (53)" الأنفال

".. إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ...(11)" الرعد

التغيير الحقيقي.. بل.. التغيير الوحيد.. يحصل داخلنا..
في الداخل.. في أنفسنا..
في أفكارنا و معتقداتنا..
احنا اللي نتغير..فنغير العالم..مش  العكس خالص..

كيف بدات دعوة الإسلام؟..
النبي فرد واحد.. بدأ يدعو الناس.. 13 سنة في مكة
يصحح عقائد الناس..
أفكارهم..لم تكن صدفة أبدا..
وبعدين*مسمهاش صدفة امها قدر لأن كل شئ يسير بتقدير الله تعالي معلش خرجت عن الموضوع 
بس بجد يجب التنويه عليها
اه قلنا ان افكار النبي واصحابه لم تكن بلا دراسة او خطط منهجية
لذلك بقؤلك ان: 

التغيير.. يبدأ من الداخل.. من عالم الأفكار..
و بالفعل.. تمت عملية التغيير..
تغيرت المجموعة اللي كان يدعوها النبي ..
فغير الله سبحانه و تعالى بهم الدنيا..
التاريخ تغير..
كان التاريخ شيئا قبل مبعث النبي و أصبح شيئا آخر بعد مبعثه ..

تغيير الأفكار..

معقولة؟..

لاتستغرب..
بالله عليك..أيهما  أسهل؟

اغير العالم من حولي؟؟.
والا أغير الطريقة اللي انا انظر بها الى العالم.
زي معتقداتي و فكاري؟..
أغير نفسي..
فنفسي هي النافذة اللي انظر منها على العالم..
التغيير ممكن..

أبسط تغيير ممكن يعمل فرق شاسع..

تخيل انت وواحد صديقك .. كل واحد سايق سيارة.
و ماشيين جنب بعض بالضبط في طريقين متوازيين..
تخيل لو الطريقين بدوا يبعدون عن بعض بزاوية منفرجة..

و لو بمقدار عُشر درجة..

في البداية ممكن متخدش بالك من الفرق..
لكن مع الوقت.. التغيير البسيط ده  ممكن يخلي واحد فيكم ماشي في الشرق..
و الثاني.. في الغرب..

كل هذا.. بسبب تغيير بسيط.. فكرة..

أهم حاجة بجد انك تقنع نفسك بالتغير  وابدأ فكر ازاي تتغير  
بجد هتلاقي اللي  يقف  جنبك وياخد بايدك
وان شاء الله هنبقي مع بعض دايما
واللي  شايف نفسه  عاوز يتغير ومش عارف يراسلنا وان شاء الله  هنكون معاه

انتظرونا  دايما ان  شاء الله
ولو عندك فكرة متبخلش بيها وقلنا عليها  ممكن تكون نقطة تحول لينا كلنا


بجد مش عاوز أخلص كلام بس يعني عاوز اقؤلك علي حاجة  اوعاك  تقلل
من شأنك  أو  تحقر من  ذاتك

طولت  عليكم  .......الي اللقاء في  موضوع آخر باذن الله

قولينا علي رأيك ...فبالطبع أكيد هيفيدنا
يلا ادخل وسجل رأيك في سجل الزوار